Fyrir hvað var hann tekinn?

Fyrir hvað var maðurinn handtekinn?
Er ólöglegt að hlaupa um fáklæddur?

Klæðalítill kappi á hlaupum

Athugasemdir

[Guðmundur Ásgeirsson, 23.11.2010 kl. 20:08]

Það kann að vera að lögreglan hafi litið svo á að um væri að ræða "ósiðlegt athæfi á almannafæri" eða "brot gegn blygðunarsemi vegfarenda".

Eða bara ógn við umferðaröryggi. Það er margt fáránlegra sem löggan hefur látið sér detta í hug, t.d. að halda mönnum föngnum án handtöku og fara með þá út fyrir bæinn og skilja þar eftir. Eins og það sé eitthvað annað en mannrán...

[Teitur Haraldsson, 23.11.2010 kl. 20:22]

Getur það verið?
Eru þeir ekki kærðir fyrir svoleiðis lagað?

Ég hefði haldið að þvilíkt viðgengist bara í svörtustu Afríku.

[Grímur (IP-tala skráð) 23.11.2010 kl. 20:39]

Það kemur nú fram að maðurinn hafi verið ölvaður og samkvæmt áfengislögum er ölvun á almannafæri bönnuð. Sérstaklega er það varhugavert þegar maður er illa klæddur á vetrarnóttu. Ekkert athugavert við afskipti lögreglu. Varðandi það að "halda mönnum föngnum án handtöku" (sem er þversögn í sjálfum sér) hefur lögregla heimild til að fjarlæga menn af þeir spilla almannareglu og allsherjarfriði, þetta er í 15 gr. lögreglulaga. Í 16 gr sömu laga segir að lögreglu sé HEIMILT að færa menn, sem eru fjarlægðir á þennan hátt á lögreglustöð.

Menn sem gapa upp í hvern annan í engri þekkingu á málefnum né heimildum lögreglu verður oft brátt í brók.  Þá er bara að skeina sig.

[Guðmundur Ásgeirsson, 23.11.2010 kl. 21:12]

Jú, þeir eru stundum kærðir fyrir svona lagað, en það ber ekki alltaf árangur sem skyldi. Þetta mál þurfti t.d. að fara alla leið fyrir hæstarétt áður en tókst að ná fram einhverju smá réttlæti gegn valdníðslu lögreglunnar:

Hæstiréttardómur nr. 147/2010, ákæruvaldið gegn Garðari Helga Magnússyni.

Lögreglumaðurinn G [Garðar Helgi] var sakfelldur fyrir brot gegn 132. gr. almennra hegningarlaga með því að hafa farið offari við framkvæmd lögreglustarfa og ekki gætt lögmætra aðferða er hann sem stjórnandi lögregluaðgerðar, í miðbæ Reykjavíkur, fyrirskipaði öðrum lögreglumanni að aka með handtekinn mann þaðan út á Granda og skilja hann þar eftir.

Fyrir þennan ákærulið hlaut Garðar Helgi tveggja ára skilorðsbundinn dóm.

Athygli vekur að einnig var ákært fyrir líkamsárás (þeir börðu hinn handtekna aftur í löggubílnum) en framburði lögreglumannsins um þann ákærulið bar ekki saman við það sem fram hafði komið fram við rannsókn málsins. Garðar Helgi reyndi með öðrum orðum að ljúga sig út úr því, og það virðist hafa tekist því hann var sýknaður fyrir þann ákærulið.

Það merkilegasta er samt að Hæstiréttur sneri við úrskurði Héraðsdóms, sem hafði áður sýknað Garðar Helga af öllum ákæruliðum.

Því hvort svona lagað viðgangist bara í svörtustu Afríku er best svarað þannig: Nei, svona lagað viðgengst líka í Lögreglunni á Höfuðborgarsvæðinu undir stjórn Stefáns Eiríkssonar sem hefur orðið uppvís að því að ljúga blákalt í beinni útsendingu fyrir framan alþjóð. Svona lagað viðgengst greinilega líka fyrir Héraðsdómi Reykjavíkur, sem sýknaði í málinu eins og áður sagði.

P.S. Ég hef líka persónulega reynslu af því að lögreglan virðir ekki alltaf sín valdmörk, ég þurfti t.d. einu sinni bókstaflega að hefta för lögreglumanns sem ætlaði að vaða inn í íbúðina hjá mér án þess að hafa til þess nokkra heimild. Því lauk með formlegri kvörtun til yfirlögregluþjóns. Ég hef einnig mátt þola ásakanir af hálfu lögreglunnar vegna máls sem var til rannsóknar þar sem fjölskylda mín hafði orðið fyrir hættulegri árás. Ótrúlegt en satt þá sakaði rannsóknarlögreglumaður mig um að bera sjálfur ábyrgð á því að einhverjum brjálæðingi datt í hug að fara í bílaeltingaleik við mig og keyra á okkur þannig að fjölskyldubíllinn fór næstum út af veginum á yfir 80km hraða. Það er slíkum vinnubrögðum að þakka að aldrei náðist fram réttlæti í því máli.

[Guðmundur Ásgeirsson, 23.11.2010 kl. 21:31]

Grímur: Það er engin þversögn fólgin í því að "halda mönnum föngnum án handtöku", á mannamáli heitir það mannrán. Handtaka er hinsvegar lögformlegt ferli sem heimilar lögreglunni undir ákveðnum kringumstæðum og að uppfylltum ákveðnum skilyrðum að halda fólki föngnu. Eins og ég benti á í athugasemd #4 þá er stundum misbrestur á að þau skilyrði séu uppfyllt.

Það er vissulega rétt að ölvun á almannafæri er óheimil, en það er hinsvegar ákveðnum vandkvæðum bundið að túlka það hvað teljist ölvun á almannafæri og hvernig skuli framfylgja þessu. Fyrir hverjum þeim sem hefur komið í miðbæinn um helgar er augljóst að lögreglan hefur kosið að framfylgja þessu ekki nema gagnvart þeim sem hafa gert eitthvað meira af sér en bara að vera fullir. Í 65. gr. stjórnarskrárinnar er skýrt kveðið á um að allir skuli jafnir fyrir lögum (svokölluð jafnræðisregla) og eru fáklæddir skokkarar ekki undanskildir frá því, burtséð frá lofthita eða tíma sólarhrings.

Menn sem gapa upp í hvern annan í engri þekkingu á málefnum né heimildum lögreglu verður oft brátt í brók.  Þá er bara að skeina sig.

Vantar þig klósettpappír, eða viltu kannski frekar nota stjórnarskránna?

[Baldur Sigurðarson, 23.11.2010 kl. 21:50]

Það veit ég að ef ég væri lögregluþjónn og fengi þá ábendingu að það væri maður á nærbuxum og sokkaleistum að hlaupa með Sæbrautinni í sirka núll gráðu hita, að því er virðist að tilefnislausu, þá myndi ég kanna málið og ef hann væri ölvaður, þá myndi ég taka hann úr umferð til að hann myndi ekki skaða sjálfan sig.

Það þarf ekki annað til en að hann detti og roti sig á bak við eitthvað þannig að hann sjáist ekki, og þá þarf ekki að spyrja að leikslokum.

Þarna erum við klárlega að ræða um rétt viðbrögð lögreglu sem kom ölvuðum manni til hjálpar áður en slys bar að höndum.

Þið ættuð að hafa það í huga, Teitur og Guðmundur áður en þið belgið ykkur meira út. Munið að hæst bylur í tómri tunnu.

Lifið heilir.

[Teitur Haraldsson, 23.11.2010 kl. 22:24]

Ég var að bera fram spurningu.
Er þetta sem sagt of viðkvæmt til þess að spyrjja um þetta?
Og Guðmundur var bara að svara, þetta var allt frekar meinlaust.
En svona er þetta, sumir vilja endilega þyrla upp skít og leiðindum.

Ástæðan fyrir að við eigum alltaf að spyrja um svona aðgerðir lögreglu er að ferðafrelsi og mannfrelsi er grundvallar réttur allra manna og allar frelsis sviptingar verður að skoða vel og nákvæmlega.

ATH Baldur, ódrukkinn skokkari getur líka dottið og rotað sig.
Hvar viltu draga mörkin?